歐耀佳醫生為佔領攞晒大假

【明報專訊】佔中持續咗70幾日，佔中醫療隊召集人歐耀佳醫生及團體一直喺佔領區服務，原來佢10月佔中開始時，已經攞咗3個禮拜大假，家已經用光假期。Emily話佢知，警察喺聽日禮拜四清場，歐醫生唯有硬着頭皮，要再向醫院申請禮拜四休假，佢話清場時，醫護義工會駐守喺金鐘海富醫療站。


歐醫生同Emily講，11月30號晚，警察喺龍和道同示威者衝突，唔少示威者被打到頭破血流，警察仲一直追到去添馬、海富天橋。佢話當時正幫傷者包紮，警察衝過嚟阻住佢救人兼且要拘捕傷者。歐醫生話周四清場時，如果警察阻住醫療隊救人，或者施救時清拆急救站，佢都會阻止。佢話即使喺戰亂國家，傷者亦受日內瓦公約保護，若受傷後再被攻擊，可以追究法律責任。