研少數民族學數 梁貫成膺長江學者

【明報專訊】舊年拎咗有數學教育諾貝爾獎之稱嘅費萊登特爾獎（Hans Freudenthal Award）嘅香港大學教育學院教授梁貫成，今年再下一城，獲國家教育部「長江學者獎勵計劃」嘉許為2013/14年度長江學者講座教授，任期3年，係全國首名喺數學教育範疇獲嘉許嘅學者。


梁教授話，根據過往研究結果，少數族裔學生嘅數學表現遜於漢族學生，可能係因為文化差異，未必同智力有關，所以喺任期內，將為內地多個少數民族建立研究框架，先針對苗族，再推而廣之，期望喺教育方法同課程方面帶來突破。梁教授仲話，與世界好多地方唔同，數學教育向來喺內地嘅學術範疇都無受到應有嘅重視，所以今次榮銜可謂意義重大，顯示中國政府重視數學教育。


另外，理工大學將頒授大學院士榮銜予8名傑出人士，當中包括資深演員兼戲劇教育家鍾景輝、影后蕭芳芳等。