財爺：創業者須有離場智慧

【明報專訊】財政司長曾俊華噚日又發表網誌，話認同政府應該支持青年創業，但一個屈尾十就話好多時創業者會失敗收場，因為有太多外在因素係佢哋不能控制，所以創業者「必須有承受挫敗嘅準備，以及在適當時間離場減少損失嘅智慧」，唔知呢句係咪要講畀仲留守喺金鐘嘅青年聽呢？

財爺喺網誌話，資訊科技普及，降低咗創業門檻，香港青年掌握資訊科技嘅能力不錯，佢有信心有一啲年輕人會睇到商機，可以開拓一番事業。但佢補充，支持青年創業並唔係打本畀佢哋咁簡單，家坊間嘅支援計劃，除咗提供資金外，遴選過程亦會評估商業計劃同創業者掂唔掂，仲有專業人士為獲選者擔任導師、過來人分享經驗，但即使創業者有夢想、決心、毅力、好嘅計劃同導師，好多時仍會失敗。


Emily留意到，正訪問中東嘅曾俊華喺網誌劈頭話，之前嗰個星期日擔心佔領行動升級，點知佢喺網誌文末就將專業人士為創業者「擔任」導師，錯寫成「擔心」，咁睇嚟財爺真係好多嘢擔心喎。