「父親日記」勉新丁 警隊拍片sell親情

【明報專訊】警察YouTube頻道又有新搞作，今次係sell親情。7個駐守唔同單位嘅前線警員，最近台前幕後一手包辦製作咗一條長約10分鐘嘅短片《父親日記》，內容講述剛出學堂半年、來自警察世家嘅小棋，因為一次抄牌時「揸正嚟做」，無畀機會個司機，畀對方指住嚟鬧，仲畀路人拍埋片。


編導演警察一手包辦

小棋好氣餒，返到屋企發晦氣，覺得「做又三十六，唔做又三十六」，話就算警察破到案，市民都唔會滿意。同樣係當差嘅小棋阿哥，搵番已去世嘅爸爸以前當差時嘅日記，當中提到佢都要與時並進，學習偵查網上罪案；又因為幫村民拉到爆竊匪徒，攞到警區最佳警員獎。


爸爸嘅日記鼓勵小棋，執法要有同理心同專業精神，於是小棋立志要將父親日記「繼續寫落去」。製作團體編劇、監製、導演都由警察一手包辦，各人粉墨登場，仲搵咗個退休「士沙」飾演短片中嘅爸爸，都幾認真。