懲教阿sir：主任同囚犯 無劇集咁親密

【明報專訊】無綫早前播出劇集《再戰明天》，入面一個懲教主任同釋囚有感情線，大家可能好奇，兩者係咪真係可以發生感情呢？噚日懲教署邀請傳媒去喜靈洲勵新懲教所參觀，高級懲教主任陳耀東解釋懲教工作，話佢哋對住在囚者，既係執法者，又似老師同社工，然後話題一轉，就講起近嚟「好多電視題材好有戲劇性」，但實際上佢哋工作，係唔容許同在囚者咁親切交往㗎，所以睇戲唔可以信到十足十嘅。


喜靈洲對外交通只有船，噚日風高浪急，大家坐咗一個鐘船入去都覺得好暈，Emily就問其中一個阿sir，如果新入職懲教人員喺度返工點算？阿sir話，當年佢都試過喺度工作5年，去到第二個禮拜已習慣暈船，相信新仔嚟到都好快適應。