貼周澄舊相諷學民 培青社再惹爭議

【明報專訊】親建制facebook專頁「香港培青社」近期好惹火，前日一帖用周澄張舊相諷刺學民思潮絕食，激到周澄噚日喺facebook反擊，話張相係2009年佢同另一名學生，於六四前夕絕食3日結束後食義工買嚟嘅粥水，點知畀人用嚟當成抹黑學民仔嘅宣傳，暗示學生絕食造假，所以要嚴正回應。


培青社：有發布自由

Emily問過香港培青社，對方就回覆話管理員知道呢張係舊相，亦有寫明「學聯絕食Style」，話完全同學民思潮冇任何關係。培青社又話發布乜嘢照片係該社嘅自由。


培青社噚日另一帖就用咗學民絕食學生黃子悅嘔「黃膽水」嘅相，話「絕食女捱唔到餓，宣布暫停絕食行動」。培青社答覆話消息來源嚟自朝早約7點嘅無綫新聞，「新聞中講述三位絕食學生中其中一位女學生因身體不適而暫停絕食，絕非杜撰！」Emily當時冇睇到無綫新聞，不過睇番無綫新聞網站，應該冇講過有學生「暫停絕食」。


葉劉被屈為警邀鋼管女

Emily亦要講句，呢啲抹黑帖唔止建制派有，民主派都有，好似早排就有改圖屈新民黨主席葉劉淑儀建議為警方提供鋼管舞女郎，葉太事後都有澄清。