劉夢熊：對話總比對抗好

【明報專訊】人稱「Dream bear」嘅前全國政協委員劉夢熊噚日現身高院，出席佢涉嫌同東方明珠主席黃煜坤等人串謀詐騙同洗黑錢案嘅預審。由於預審閉門進行，佢唔方便透露詳情，不過就開腔評論佔領行動，認為「對話總比對抗好」，又話特區政府唔同學生對話，就係佔領拖咗60幾日嘅原因，要求政府查找不足咁話。


劉夢熊呼籲特區政府攞出對話誠意，「唔掂傾到掂」，又希望中央透過對話解釋人大8．31決定，而唔係用「大石砸死蟹」嘅態度面對批評。至於警察對付佔領者嘅手法暴唔暴力，劉夢熊就話「見仁見智」，但佢認為警察要文明執法，佔領者亦都要堅持和平理性非暴力原則。


順帶一提，劉夢熊單案將會喺下年3月2日開審，下一次預審會喺下年1月27日進行。