田少變榮譽主席 方剛做黨魁

【明報專訊】自由黨田北俊因叫特首梁振英考慮辭職，搞到失去全國政協職銜，又辭埋黨魁一職，自由黨噚日選出新任領導層，田少轉做榮譽主席，由方剛當黨魁專責處理立法會事務。方剛就話，有傳媒話工業界嘅林大輝「如無意外」會入黨，是否成事要睇吓家至12月31日有無意外，佢話大輝入黨可以係「如虎添翼」，但「最緊要你同我睇吓有無意外發生」。


新選出嘅自由黨領導層，榮譽主席增至3個，除咗新增嘅田北俊，其餘兩人係周梁淑怡同劉健儀。方剛解釋，3個榮譽主席各有分工，劉健儀主要做「bill后」協助處理立法會法案，周太就做宣傳工作；至於田少人際網絡廣，希望佢可以負責吓公關工作。自由黨主席就由鍾國斌接手，原本有兩個位嘅副主席就只有一人，由東區區議員邵家輝出任。


繼續將功能組強項「發揚光大」

方剛宣布新領導層時就自動波解釋，自己接任黨魁唔係臨危受命，佢亦絕對唔係扯線公仔，自由黨會繼續喺立法會功能組別及地區直選中「兩條腿走路」，將佢哋功能組別「強項」繼續「發揚光大」。方剛話佢哋同「中環」關係唔錯，梁振英仲「好畀面」會請自由黨一齊食飯，田少都會去。


田少就話，家行政立法關係搞到咁，泛民議員又喺議會拉布，佢認為特區政府要結交多啲朋友，梁振英叫佢食飯佢梗要去，亦希望梁振英之後會請其他政黨食飯。