財爺﹕商界精英多 搞社企有優勢

【明報專訊】財政司長曾俊華噚日嘅網誌，講最近熱爆嘅社企認證標誌「SEE Mark」，佢引述哈佛商學院學者話，財富過度集中等問題威脅緊資本主義制度，如果商界改變營商手法同衡量成功準則，就可以幫手解決社會問題。財爺覺得呢個理念同社企一樣，仲話香港有咁多商界精英同專業人士，又有社會服務網絡，已有搞社企嘅優勢。


全港有450間社企，比2008年260間多咗超過七成，一般社企股東唔會攤分多過35%盈利，甚至係非牟利。財爺話，社企唔會只追求盈利，又可以為社會注入正能量，負責營運嘅人唔止營商叻，仲要講求社會效益，所以更有挑戰性同滿足感。佢話希望社企可以為有理想、有抱負嘅年輕人提供另類工作選擇，同有助解決社會問題。