青年問題拗到政改

【明報專訊】政府評估佔領運動部分原因係青年問題，特首梁振英表明會研究青年政策，噚日港台節目《城市論壇》就搵咗社民連黃浩銘、自由黨李梓敬、新民黨甘文鋒3個青年，加埋浸大青年研究實踐中心副主任黃昌榮討論青年問題，不過政黨成員坐喺度，好快又將題目講番去政改，搞到黃昌榮喺節目度都無乜聲出。


黃浩銘話，梁振英完全睇唔到青年訴求，佢覺得青年要嘅係命運自主，但梁振英將青年問題做幌子，唔面對制度問題令貧富不均等。李梓敬就話，青年人面對房屋、就業等問題，但現時政府被泛民不合作運動影響，令政策唔能夠落實，反問邊個先係罪魁禍首。


結果兩人喺政制問題上不斷爭論，李梓敬話希望循序漸進落實民主，仲話殖民時代都完全無民主，佢話2017年唔係終極方案，希望先落實一人一票，又話泛民支持者佔大多數，普選特首都要回應泛民支持者訴求。黃浩銘反問，家唔係殖民年代，既然泛民支持者係大多數，如果到時選出梁國雄、黃毓民同陳偉業3個泛民，咁李梓敬會唔會接受呢？