節能中電用戶 可「過電」畀弱勢社群

【明報專訊】中電總裁潘偉賢噚日同傳媒茶敘公布，明年中電會推行「全城過電」活動，以210萬中電住宅用戶明年6月1日至7月31日嘅用電量，同2014年同期用電量比較，用戶每慳1度電，中電股東就會捐出1度電畀弱勢社群。換言之，除咗用戶本身可以透過節能慳番電費，仲可以將電「過」畀弱勢社群。


慳1度電 股東捐1度電

中電無為參加活動住戶設上限，仲話住戶如果已經慳無可慳，亦可直接捐款，每捐1蚊，中電同樣會以股東嘅資金配對客戶捐款，為3萬名弱勢社群交電費。潘偉賢話，搞節能講就容易，但最緊要到位，唔到位係唔會持久嘅。


有「營」飯堂加碼暖長者

另外中電又預告，2011年開始推行嘅「有『營』飯堂」，明年5月會由深水埗區擴展至全港14區，加碼派出12萬份熱食畀有需要長者，長者憑券可以到指定連鎖快餐店，享用一餐營養熱食。