一哥高主教校友 刊聲明譴責包庇下屬

【明報專訊】做警務處長原本可以為母校增光，不過近200名高主教書院嘅舊生、學生同前教職員就似乎唔係咁諗。呢班舊生、學生同前教職員噚日喺報章刊登聲明，強烈譴責身為舊生嘅警務處長曾偉雄縱容及包庇下屬，對一哥言論深表遺憾。


聲明表明支持「雨傘運動」，批評在位者無設法解決問題，用各種手段加深社會撕裂，推搪塞責深惡痛絕；又促請一哥以高主教已故校監處事大公無私嘅精神為榜樣，公平公正對待示威者。


聯署者包括土地正義聯盟執委朱凱迪、曾喺金鐘佔領區絕食40日嘅前政府測量師莫紹文等。佢哋要求特區政府回應市民訴求、人大收回8．31決定，喺2016年立法會選舉中廢除功能組別。


另一個有參與聯署嘅民主黨成員吳兆康話，聲明出咗之後，校友會同校董會內嘅黃絲帶同藍絲帶都有啲反應，相信佢哋會討論，唔排除有唔同意見嘅人會有行動。吳兆康又話登聲明籌到3萬幾元，比登報所需多咗幾千元，或會用嚟買物資撐佔領，或捐去教育基金，但要商討後先有定案。