落地唔夠半月 九巴混能車「跪低」

【明報專訊】為咗推動綠色運輸，九巴早前獲政府全額資助，引入3部混能空調雙層巴士「hBus」，今個月11號正式載客，行駛尖沙嘴碼頭至中秀茂坪嘅1A線，不過hBus行駛唔夠半個月就「跪低」咗。Emily發現早前有巴士迷上載咗張喺車廠影嘅相，顯示喺本月22日，行駛1A線嘅hBus（車牌號碼TA2132）因為「自動死火」要留廠，未經授權唔可以駕駛，唔少巴士迷關心hBus係咪咁快就唔掂。


九巴之後同Emily講，證實呢部hBus日前因為有乘客投訴懷疑引擎自動死火，車長為慎重起見，將佢駛返車廠交由製造商檢查，但檢查後發現—切正常，第二日已重新投入載客。九巴解釋，由於hBus係由電力推動，引擎係作為電池叉電之用，當電池叉滿電唔使用時，引擎就自動停止。


不過，無獨有偶，另一部行走順利邨至港澳碼頭嘅619線hBus，原來都入咗廠，九巴話由於呢部hBus叉電系統燈亮起咗，車長為咗謹慎起見，將車駛返入廠，並通知製造商檢驗系統。九巴話新車落地一般都有調節期，會繼續同生產商密切聯繫。