反佔中新界青聯 去過佔區搵學生傾偈

【明報專訊】新界青年聯會一直都係反佔中團體，但原來佢哋嘅成員都曾經深入「敵陣」，去到佔領區同參與佔領行動嘅學生傾偈，話要了解年輕人參加社運嘅原因。身兼該會主席嘅民建聯立法會議員陳恒鑌（Ben）就話，大部分學生都覺得社會前景無乜希望，所以參加佔領。


陳恒鑌：會寫報告畀政府

阿Ben話將會寫份報告畀政府，講解吓班學生參加佔領嘅原因。佢話好欣賞學生有理想，但對於學生以佔領方式表達意見就有保留。阿Ben話仲會建議政府搞多啲國際交流團，等學生有機會去吓新加坡同越南等地方，了解當地嘅經濟民生建設同時，仲可以從國際關係層面了解各國同中國嘅外交關係，咁樣學生就可以從宏觀角度學習國情。


阿Ben強調交流團唔係純旅行團，學生參加完回港，要寫報告同出席分享會。仲有，佢建議每個團都要有一個主題，例如去新加坡就學習當地房屋政策，相信學生都會有興趣。