支聯阿人難搵人接棒

【明報專訊】支聯會即將改選新一屆常務委員，Emily前排聽聞，現任支聯會主席李卓人就話無意連任，希望可以專心處理工黨黨務，發展工黨，仲放聲氣話希望有其他「人」可以接手分擔工作；點知風聲傳咗一排，就點都吹唔郁其他支聯會兄弟接手。


支聯會將於本月30號選出新一屆常務委員，今日截止報名。Emily前幾日見到何俊仁時，問仁哥肯唔肯接手支聯會主席，點知仁哥攤開雙手、兩肩一聳，帶笑同Emily講﹕「佢（李卓人）應該都係要冧莊㗎喇！」


教協黃克廉或選支聯常委

至於副主席又會唔會有新人加入呢？支聯會副主席蔡耀昌噚日笑笑口話，支聯會正、副主席要由常務委員互選產生，唔好講到好似內定咁。不過，佢講完一輪，到總結時就講咗一句，支聯會領導層變化應該唔大嘅。


支聯會由唔同民間團體組成，而教協一直係中堅分子，但Emily聞說教協理事會年初改選後，因為新就職，所以搞咗一輪先搵到理事會人選去做支聯會常委。雖則民主黨、教協監事會副主席張文光仍會參選常委，但監事與理事去做支聯會常委，意義上始終唔同。結果搞咗一輪，教協如無意外會由副會長（內務）黃克廉出選。