獲贈粗口歌 Ann姐﹕唔識林日曦

【明報專訊】雜誌《100毛》創辦人林日曦因為好欣賞民建聯立法會議員蔣麗芸（Ann 姐）喺立法會嘅發言，話為大家帶來歡樂，仲可以啟發年輕人，所以送咗首粗口歌《話你戇X怕你嬲》畀Ann姐，以表心意。但Ann姐唔多受落，「我最唔鍾意人講粗口」，又話唔知林日曦係邊個，亦無聽過《100毛》喎。


林日曦喺商台節目《在晴朗的一天出發》嘅「特別的歌點給特別的人」 環節中，點咗由網民David Cheang創作嘅粗口歌《話你戇X怕你嬲》畀Ann姐，首歌係關於佔中引發嘅反思，喺YouTube有15萬點擊率，歌詞其中一句係「你沒有信念請行埋一邊，咪阻擋理想開花那一天」。