林超英向CY財爺薦書

【明報專訊】天文台前台長林超英退休後唔止去大學教書，亦繼續睇好多書。佢近日獲邀上電視節目，介紹Tim Jackson寫嘅Prosperity without Growth （誰說經濟一定要成長），希望更多人知道「經濟增長」唔係社會繁榮嘅前提，佢仲話要推介呢本書畀特首梁振英（CY）同財爺曾俊華睇，「因為要似書中咁講，令所有香港人都開心嘅繁榮，而唔需要經濟增長，必須由政府高層推動」。


林超英仲喺facebook話，香港過去三四十年實驗證明，GDP愈增長、香港人愈來愈不快樂，青年人愈來愈睇唔到人生路上嘅希望，因而愈來愈唔願意結婚生子，甚至覺得要主動到街上參加社會運動，再咁樣走落去，香港呢座外表巍峨但有內傷嘅大廈，一定會猝然傾倒。


佢話，「佔中」側面折射出繁榮下嘅不安定，香港必須鄭重認識過去所謂「發展」衍生出來嘅動盪，重新確立未來「發展」目的與方向，消除社會不穩定，為大眾創造安居樂業大氣候。