馬雲：若收富人稅 寧捐八成身家

【明報專訊】有錢佬嘅嘢，普通人真係識乜吖。話說有錢後好煩惱嘅內地首富、阿里巴巴執行主席馬雲，早排上央視《對話》節目嗰陣，就再話唔開心。皆因自己使幾多都有個譜，但如果阿爺要有錢佬交80%稅，令貧富差距收窄，佢又話唔制，即係點呢？


「殺晒地主 農民亦不會變有錢」

原來阿馬總覺得，社會唔應該仇富，話無理由殺晒村入面嘅地主，班農民就會做咗有錢佬。如果要收咁重稅，佢寧願捐八成身家出嚟幫啲窮人，「這不是我的錢，只是我替大家去花這個錢，而且花也不花在自己身上」。佢認為減稅先係內地最需要做嘅嘢，咁先至令經濟愈嚟愈好。


到底幾時先見到呢日，小琴都真係估唔到，阿馬總無講到明到底捐唔捐。老實講佢第日真係捐咁多出嚟，以嗰副千幾億嘅身家，真係有機會做內地首善㗎，希望佢諗諗啦。