股壇長毛動員反合伙人制

【明報專訊】舊年阿里巴巴諗住用「合伙人制」嚟香港上市，「股壇長毛」David Webb已經鬧到爆，話「同股不同權」會破壞香港制度。之但係港交所（0388）眼白白睇住美國食咗呢舊肥豬肉，就諗住問下市場，睇下有冇得喺香港搞到。話說個概念諮詢到月底就到期喇，噚日阿Webb就喺自己個網度，整咗封長信畀港交所，仲乘機搞埋個簽名運動反對，截到噚日9點幾有77個人簽咗，而目標就係388人，即係港交所個交易冧巴。


阿Webb話香港本身個公司管治夠晒差，若果引入同股不同權，啲大股東揸少少股份已經話晒事，其他股東蝕底到乜咁。


批評港企管治夠晒差

好似大股東私有化嗰陣，唔使畀咁多錢出嚟，又或者更加容易做到內幕交易。不過阿Webb都唔係一味鬧，佢建議限啲大股東，最多都係得30%投票權，咁就減低獨大嘅機會。


[小琴密語 email: piano@mingpao.com]