郵署有「死信組」

【明報專訊】Emily寄信時都試過寫錯地址，民建聯議員葛珮帆噚日向立法會提出質詢，要求香港郵政交代一下，點樣先會開啟郵寄地址不完整嘅信件。商務及經濟發展局長蘇錦樑回覆時話，一般無法派出又無回郵地址嘅郵件，原來會交畀香港郵政「死信組」處理，唔會開啟，兼且即刻銷毁。


無回郵唔會開 即銷毁

蘇局長又話，如果係郵包或包裹，就會經主管人員監督下拆封，可轉售物件仲會交政府物流服務署拍賣，否則都會銷毁。不過，若有空郵郵件過唔到安全檢查，郵政人員就會喺一個進出受限、受閉路電視監察嘅範圍拆開郵件檢驗，之後會以專用膠紙封口同貼上標示。


不過，郵件如果有清晰、完整嘅寄件人地址，香港郵政一般會喺收到郵件後一星期，將郵件派番畀寄件人，亦會蓋有「退回」、「查無此人」或「無此地址」等字樣。


至於葛議員提及有報業集團早前投寄多封信件，兩個月後被「打回頭」之餘，仲將9封信放入同一個公文袋寄回；蘇局長就話，按一貫處理程序唔會咁做，但就不對今次事件作回應。