Law少挑戰全馬

【明報專訊】香港近年興跑步，每年渣打馬拉松參賽名額一定爭崩頭，下年其中一名全馬參加者係前DJ「Law少」許耀斌。5年前曾經捐肝嘅佢為咗訓練，家一周至少跑步4日，夾埋成40幾公里，為嘅係同自己比較，睇吓可唔可以做到更多，希望將自己全馬最佳時間推前半個鐘，去到4小時之內。


玩毅行渡海泳鐵人

Law少5年前媽媽患肝癌，要做手術捐肝救母，醒來第一個感覺係從未有過咁口渴，於是啟發佢要對自己身體認識更多。佢話「做手術前做運動係同人哋比較，做完手術就係同自己比較」，佢做完大手術一年已經再做運動，又以捐肝者身分參加毅行者，今年先試完渡海泳同三項鐵人，話咁快又參加全馬。


兩年前Law少同患有十幾年思覺失調嘅哥哥爭執後，哥哥跳樓離世，亦啟發佢生命一瞬間就會走，生活唔好太物質化，所以一年多前佢辭咗商台份工，以自由撰稿人身分為哥哥寫書紀念。佢話，哥哥離開亦令佢想去了解弱勢社群嘅世界，將來想試吓做領跑員。