智叔被指影射曾主席

【明報專訊】香港電視（HKTV）噚晚開台，首播嘅《選戰》成為唔少港人嘅熱話，不過呢套政治劇，政界唔少人都未開始睇，而表明已經喺5個裝置都裝晒港視個App嘅商務及經濟發展局長蘇錦樑（Greg），亦未開始煲劇，佢話前日全日都好忙，根本無時間，皆因佢夜晚去咗無綫台慶，見證王祖藍向李亞男求婚嘅一幕。


台慶見證祖藍求婚蘇：覺得係真

Greg話，噚日下午佢就要出差，所以都未有時間睇《選戰》；至於祖藍求婚，在場見證嘅Greg就話佢覺得係真嘅，都好感動，又話現場個音響一度壞咗，所以都聽唔到台上兩人講乜。


有睇《選戰》嘅人都可能覺得，劇中主角廖啟智（智叔）飾演嘅立法會主席宋漫山，似乎係影射緊立法會主席曾鈺成。Emily噚日問曾主席，佢就話未睇劇，但被問到有角色影射佢，曾主席竟然都講得出係咪廖啟智？仲話「廖啟智咁靚仔，點影射到我？」不過似乎港視都要宣傳吓喇，因為唔少議員都仲未知道點樣可以睇港視，好似曾主席同新民黨主席葉劉淑儀都唔太清楚。


陳志雲指《選戰》高水準

另外，無綫電視前總經理陳志雲就話前晚有睇《選戰》，認同係高水準製作，又話如果市民繼續支持呢類水準嘅電視劇，對港視下次申請發牌有重要作用。