警棍現屎坑 許sir斥偷竊

【明報專訊】立法會被衝擊後，網上流傳一批相片，見到疑有警棍同盾牌等裝備到處擺，無人看守，最離奇係有支疑似警棍喺屎坑內。今次運動以嚟最受批評嘅衝擊事件，有網民就質疑，點解衝擊咁耐都無警察，又點解咁多次衝擊，只係呢一次會見到裝備亂擺，覺得有古怪咁話。


促還1警棍1頭盔2盾牌

警察公共關係科總警司許鎮德（許sir）噚日喺記者會話，警方唔見咗1支伸縮警棍、1個頭盔同2個盾牌，被問到係被偷抑或唔見咗，許sir就話「大家可以從電視鏡頭，見到示威者將同事嘅警棍拎走咗，可以話偷走咗」。佢仲話社會大眾唔會接受，呼籲尋獲裝備嘅人立即交還。Emily睇番TVB嘅片段，混亂間有警員跌咗警棍，畀示威者執走咗。


另外，警方真係好認真打公關戰，噚日喺YouTube上載咗一段兩分幾鐘嘅短片「非法佔領—旺角（Illegal Occupation - Mong Kok）」，由警察公共關係科製作，加咗激昂配樂，話至今旺角拉咗127人。