沙官百計舊生聯署 批《人民日報》失實

【明報專訊】早前內地官媒《人民日報》海外版疑引用《文匯報》嘅不正確資料，批評沙田官立中學一份中二級中文科試卷嘅成語填充題上，要填「草菅人命」形容警方喺9月28日施放催淚彈先可得分，校方澄清正確答案其實係「不近人情」。據悉，一班沙官校友上周五起發動網上聯署，譴責《人民日報》報道失實，並希望保衛學校嘅學術自由與保障師生學習環境安全，至今已收集咗200名舊生簽名，最快下星期初於報章刊登廣告。


發起聯署嘅其中一名沙田官中舊生龍小姐強調，聯署同校友會無關，純粹係一班舊生自發，廣告費由舊生各自捐款集資。


副校：尊重做法 盼早日平息

沙官副校長杜景文就同Emily講，校友有個人自由，校方會尊重佢哋表達意見嘅做法，前日亦有兩個校友向學校遞交一封鼓勵信，表達佢哋對今次事件嘅立場。至於今次事件有無畀教育局「施壓」，杜副校就話，校方一直有就事件提交報告畀當局，強調完全無施壓，純粹係等當局知道事件最新情况，而佢自己都好希望事件可以早日平息。