觀鳥節加映安樂窩

【明報專訊】一年一度嘅觀鳥節聽日開始，市民唔止可喺濕地公園觀賞唔同嘅鳥類，仲可以「登堂入室」，睇埋佢哋各式各樣嘅安樂窩。


濕地公園保護區經理鄭諾銘同Emily講，平日雀鳥會將鳥巢築喺隱蔽嘅地方，為咗今次「雀鳥安樂窩」展覽，濕地公園趁住非繁殖季節，特登蒐集鳥巢展出。


鹹水草上可築巢

喺濕地上嘅鹹水草上面都可能築巢？純色鷦鶯就得！佢哋會「織織復織織」，將細密嘅、橢圓形嘅巢固定喺草上，以免蛋同幼鳥跌落濕地。


展覽仲可以畀入場人士親手試下築巢嘅感覺，鄭諾銘示範完後話，原來冇雀仔嘅喙，手指唔夠精細，係好難築一個結實嘅巢。喺園內生活嘅雀鳥除咗築巢，原來仲可以免費「上樓」，事關園方為一啲需要喺樹窿入面棲息嘅鳥類造咗約40個人工巢，園內5種鳥類包括貓頭鷹都會「check-in」，旺季時「入住率」都有五成㗎。


2015黑臉琵鷺全球普查仲開放畀公眾參與，完成訓練嘅普查員，可以喺明年1月一齊數數香港黑臉琵鷺嘅數目，數字將會用嚟同步統計全球嘅黑臉琵鷺數目。