平安鐘覆蓋少數族裔長者

噚日係一年一度長者日，為長者提供支援服務嘅平安鐘，噚日宣布服務升級，增聘3名「呼援服務員」，令服務覆蓋少數族裔長者，支援印地語、烏都語、旁遮普語及孟加拉語嘅「老友記」。


長者安居協會行政總裁梁淑儀話，除咗外傭，本港約有11萬名常住少數族裔人士，部分係本港落地生根嘅第一代移民，其老年人口趨增，但言語不通，當佢哋需要緊急醫療支援時往往遇到困難，有見及此，遂聘請3名本地少數族裔人士擔任呼援服務員，可照顧約30名已登記少數族裔長者。


適逢長者卡計劃推行20周年，為表達對老友記嘅謝意，噚日65歲或以上長者只要出示長者卡，就可免費乘搭港鐵、巴士、天星小輪等交通工具；逾900間食肆提供九折以上或其他優惠。中電噚日仲舉辦萬歲宴同400名長者過節，中電總裁潘偉賢邀請社署署長葉文娟等嘉賓，親手縫紉碎花布製作「百家被」為長者送暖；聖雅各福群會亦舉行烹飪比賽，由子女為父母炮製小菜，希望藉活動鼓勵下一代主動同長者共餐。