家鄉頒名譽博士 唐唐向學生講理想

【明報專訊】前政務司長、全國政協常委唐英年最近獲佢江蘇家鄉嘅江南大學頒授名譽博士學位，佢前日去到大學接受榮譽亦有致辭，向年輕大學生提出3點希望，可能香港正處於佔領，雖然佢向學生講希望時隻字不提佔領，但相信大家睇完佢點講，都會對號入座，覺得佢亦遙遠咁同香港學生講呢番話。


唐唐話，學生要一步一腳印，務實咁實現理想。佢話年輕人有理想、目標，永不言敗嘅精神係重要，但理想、目標唔係搵幾多錢咁簡單，亦要諗得更深遠，要透過能力、努力逐步實現。


第二樣寄語學生嘅，就係希望佢哋將知識同做人道理結合，唐唐話喺大學階段除咗知識，仲要學做人，學習處理人與人之間嘅關係。最後就係要處理好繼承傳統同突破創新，要承先啟後。