列顯倫係湯家驊恩人

【明報專訊】公民黨立法會議員、資深大律師湯家驊（Ronny）噚日喺港台節目《千禧年代》透露，終審法院非常任法官列顯倫係佢半個恩師，喺佢最困難嘅時候幫過佢，令佢可以完成學業。Ronny同Emily講，原來佢1972年去英國牛津大學深造，身上唯一嘅財產就係一支電結他，好彩得列顯倫借咗300英鎊畀佢，先可以完成學業。


湯赴英深造無錢 列顯倫借錢

Ronny憶述當年因為無錢，去到英國就要變賣結他交學費同交租，但支結他賣得50鎊，一個禮拜就用完，「我記得當時好徬徨」。列顯倫當時因為雨災喺香港半山區被埋，返咗去英國養傷。Ronny就向列顯倫求助，Ronny仲好多謝列顯倫從未叫過佢還錢，後來學業有成返到香港，就去咗列顯倫嘅律師樓執業，慢慢還錢喇。