田少着葉劉小心「偷雞唔成」

【明報專訊】新民黨主席葉劉淑儀早前打「開口牌」，公開向自由黨成員招手，不過自由黨無有怕，最近仲大搞招募黨友計劃，自由黨田北俊噚日仲反叫葉太小心「偷雞唔成蝕渣米」。佢話新民黨原本的確同自由黨路線好近，都係中堅中立，不過葉太喺佔中一役上言論極左，走向民建聯等政黨方向。


田少話，新民黨咁搞法，當日佢細佬田北辰喺自由黨帶走咗班人去新民黨，隨時會回巢。田少當然無透露有幾多人回歸，但承認的確有新民黨員有意轉投自由黨。


好想羅致林大輝

至於田少嘅心儀羅致目標、廠商會嘅立法會議員林大輝，田少就話對方明年1月卸任廠商會會董，相信會減少佢唔入政黨嘅束縛，到時就會明確啲喇。佢又分析話，廠商會會長選舉，李秀恒爆冷贏出，似乎反映佢哋內部都有兩派聲音，而全國政協常委陳永棋堂妹陳淑玲落敗，反映棋哥喺會內影響力下降。不過田少分析咗幾句，就話佢最關心嘅都係林大輝去向，而唔係廠商會內部情况喎。