葉劉未去過台灣怕冲涼被偷影

【明報專訊】台灣係港人熱門旅行地點，但原來新民黨主席葉劉淑儀咁大個女都未去過台灣，皆因聽聞當地嘅特工好叻安裝針筒攝影機，擔心入住當地嘅酒店，「驚冲涼畀人影到」。不過，葉太家其實都心郁郁想去台灣行吓，想考察當地科技發展，又想見識一下當地書店。


心郁郁想去台灣考察

葉太講到當年港英年代做官時，有政治顧問建議佢唔好去台灣；回歸後，喺2003年左右又錯失咗一次同時任台北市長馬英九食飯見面嘅機會。葉太話當時有朋友可以安排大家見面，但葉太覺得唔係太方便，所以就無去。


香港2017年有特首選舉，台灣2016年就有總統選舉，被問到有無興趣去台灣睇總統大選取經，葉太笑笑口話可以諗吓，但一定要解決咗住宿問題先，佢話唔住酒店，可以考慮喺朋友屋企住，相信會安全啲。