田少搣柴後查詢增 自由黨開fb吸人

【明報專訊】自由黨田北俊被撤銷全國政協委員職銜後，據聞有人向自由黨敲門想加入，自由黨似乎想食住個勢，噚日喺facebook開post招募會員。青年團主席李梓敬話，除咗facebook，佢哋仲會印製約100條banner，稍後喺全港各區掛起「吸人」。


籲「憑良知，為香港」加入

自由黨喺fb開post，呼籲有興趣人士「憑良知，為香港，加入自由黨」，佢哋話今個月收到唔少查詢，問點加入自由黨，所以特別舉辦招募行動，佢哋特別提到政黨唔係聯誼會、唔係商會，入黨最重要認同佢哋嘅基本理念，好似政治上，唔會盲目保皇，亦唔會為反而反；經濟理念就崇尚自由，減少政府干預，反對濫用福利；道德比較保守，要捍衛傳統家庭價值。


李梓敬話早前都舉辦過招募黨員行動，都收到幾十份表，希望今次都可以吸引到100人加入，佢強調田少人氣勁，多人欣賞，都希望大家留意吓係咪認同自由黨理念先。今個月26日佢哋舉辦社交活動，邀請田少做嘉賓，至今已有超過200人報名，佢話當晚係佢哋吸人入黨嘅大好機會。