六散人都有發言人

【明報專訊】立法會唔少「獨立單頭」議員，由於佢哋無黨無派，所以政府要游說、大家要數投票意向時都幾麻煩，不過近月，6個獨立建制派議員就走埋一齊，就日常立法會事務多啲溝通，6個議員包括出任召集人嘅商界廖長江，旅遊界姚思榮，保險界陳健波，金融界吳亮星，建築、測量及都市規劃界謝偉銓，同埋體育、演藝、文化及出版界馬逢國。


召集人廖長江﹕非組政黨

廖長江強調唔係要組成政黨、政團，只係一個議事平台，每星期開一次會，希望喺重要議題上有共識，雖然組織鬆散，但原來佢哋都將唔同政策範疇分咗發言人制度，例如環保事務嘅，就由謝偉銓（Tony）負責，如果政府要拉票或者約見，咁佢哋都會叫對方搵Tony。有咩消息，佢哋6個亦會互相通報。


政府正就施政報告同財政預算案做諮詢，佢哋6個亦會一齊見特首梁振英，不過廖長江話佢哋都係會各自表述，唔會話先討論有乜嘢共同建議，6個一齊提出以增加牙力。