暉暉點歌《我不願讓你一個人》

【明報專訊】佔領運動令到學聯一眾成員攰到散晒，學聯副秘書長岑敖暉（圖）噚日就喺商台節目《在晴朗的一天出發》嘅「特別的歌點給特別的人」環節中，點唱咗台灣組合「五月天」嘅歌《我不願讓你一個人》，講到明係送畀學聯秘書長周永康同一班學聯戰友。岑敖暉話，佔領行動逾40日，知道大家一路走來都好辛苦，希望可以一齊繼續打仗，唔希望有人獨自一個孤單上路。


五月天呢首歌嘅歌詞中，包括「我不願讓你一個人，一個人在人海浮沉，我不願你獨自走過，風雨的時分」，估計暉暉都係想借用歌詞鼓勵大家。但Emily亦發現，呢首歌原本係一首情歌，官方版MV亦將之拍成情侶嘅故事，仲寫咗個註腳，話「我想對你說﹕『你，就是我最放不下的人。』」。


早前學聯常委梁麗幗已經試過喺同一節目，以周永康同岑敖暉嘅「緋聞」開玩笑，點咗何韻詩嘅《勞斯萊斯》畀兩人，之後周永康就回敬咗一首RubberBand嘅《發現號》畀一班學聯戰友。