科學園助創業

【明報專訊】近年香港多咗唔少創業社群和創業青年，香港科學園亦不甘故步自封，決心衝出科學園，主動同外界合作，推出一個「科技企業家夥伴合作計劃」（TPP）。


科學園話今次揾咗13間創業社群，包括太古地產旗下嘅blueprint，仲有港大、中大、科大等6間大學，做合作夥伴。之後會去到學校同創業社群，為零起點嘅創業公司、創業青年提供尋找資金、建立Business Model各方面嘅指導、等佢地嘅創業更加「Solid」。即使係一般社會人士，今次科學園都開設一個TecONE基地，有兩位全職嘅科學園大使，可以網上、電話或者面對面提供專業意見。


馬錦星：科學園絕對唔做地產商

科技園總裁馬錦星笑言，海外好多創業項目，最尾都係地產項目，「科學園絕對唔做地產商」，所以要衝出地理界限，培訓人才。科學園估計，TPP推出後每年有幾百間公司受惠。不過，如果真正要享受到科學園嘅免租辦公室等等福利，就仲要過五關斬六將，申請到科學園嘅孵化項目先，馬錦星就笑笑口話，呢個係創業嘅下一步啦。


[小琴密語]