汪阿姐寄語學生返回現實

【明報專訊】人稱「汪阿姐」嘅藝人汪明荃，身兼政協身分，噚日開腔談佔領行動，佢話佔領行動到家「不可收拾」、「缺課成個幾月點得嘅啫，亦都影響各行各業經濟，呢啲唔係咁好」，話自己雖然都被學生感動，但認為要「務實啲返去現實」，勸學生應該返回學校，又認為社會應該給予年輕人更多機會發聲。


汪阿姐噚日以顧問身分出席「團結香港基金」成立典禮，佢話都認同學生「好叻、有理想、有勇氣，但我諗佢哋真係要睇多啲歷史」。警方被質疑濫權，阿姐認為警方用催淚彈係「最低武力」，因警方夾喺中間，「點去制止？都好難避免，當時唔係淨係學生嘛！」


阿姐又講到香港電視開台，「歡迎！多啲競爭梗係好」，但「晨早就要睇劇，我覺得呢個邏輯又怪啲喎！」佢話自己睇新聞多，港視開台對佢影響不大。


汪阿姐係全國政協委員，更曾以主持身分訪問另一名曾係全國政協委員嘅田北俊，咁佢又點睇田少因為叫特首考慮下台而被撤銷政協委員職務？阿姐話，每個組織都有自己要遵守嘅規則，田少亦承認忘記咗自己身分，覺得「公眾人物真係要知道自己講咩」咁話！