工程師會搵倫永亮鄭國江寫歌

【明報專訊】好聽嘅歌令人回味無窮，如果係會歌，仲可以增加歸屬感及吸引新人加入。近年基建工程暢旺，為咗吸引更多年輕人投身行業，工程師學會噚日推出第一首會歌，係學會成立67年以來首次「有歌唱」，歌名《天工》，取自成語「巧奪天工」。呢首歌來頭唔細，作曲人倫永亮，填詞人鄭國江，都係猛人。


今次學會仲為呢首歌設計咗一套音樂影片同卡拉OK版，片中主要都係介紹香港嘅工程成就，例如港鐵、青馬大橋等。新任會長張志剛早前帶領會員喺就職晚宴上首度獻唱《天工》。如果大家都想聽吓首歌，可以瀏覽http://www.youtube.com/hkiechannel。