何俊賢月尾娶老婆

【明報專訊】雖然立法會近日不停拉布，但嚟緊有開心事，民建聯立法會議員何俊賢今個月30號會同女朋友拉埋天窗，不過佢結婚就好低調，噚日向黨友派喜帖畀記者發現，佢先至和盤托出。其實結婚都係開心事，所以佢噚日向立法會主席曾鈺成派帖，曾主席恭喜佢之餘，亦叫佢唔使咁神秘。


未婚妻是社工 拍拖3年

何俊賢話，佢當日會喺元朗一間酒樓擺30幾40圍，但由於親戚好多，單係男家親戚都佔咗近20圍，所以政界朋友唔會請太多，只係會請民建聯立法會同事等。佢話結婚都係從簡，當日早上先註冊，好多事都未預備好，甚至結婚戒指都未買，菜單又未定實，唯一肯定嘅就係唔會食魚翅。


問何俊賢將來會唔會抽多啲時間陪太太，佢就話做唔到，仲話自己唔會承諾做唔到嘅事，但都希望下年暑假有時間一齊去旅行。咁準新娘有無埋怨？何俊賢話間中會有「零星嘅雜音」，但整體都ok，好多謝對方體諒。佢透露女朋友係做社工，拍咗拖3年幾，當年做義工時認識對方。