叫錯曾鈺成特首 大輝話真心話

【明報專訊】立法會噚日繼續討論係咪引用權力及特權法，調查特首梁振英收取UGL約5000萬元嘅事件。讀者好記性的話，都會記得早前大輝喺議會批評梁振英時，被主席曾鈺成問佢係咪政協，噚日大輝發言時表明，自己唔會唔記得政協身分，但不支持調查事件，並唔係因為政協身分。


大輝喺會上發言時，仲一度叫錯曾主席做「特首」，佢澄清時話﹕「對唔住，我衝口而出，真心話一時講出嚟。」


長毛叫「元秋」 蔣麗芸不滿

民建聯蔣麗芸發言時就力撐梁振英，又希望泛民唔好成日「幻聽、幻想」。之後社民連梁國雄發言，多次叫蔣麗芸做「元秋」，結果蔣麗芸問主席，話長毛叫佢做元秋，「我可唔可以話佢唔應該咁講」。曾鈺成話，如果佢覺得對方有違反議事規則或者要求澄清，可以指出係違反邊一條規程，蔣麗芸就話「好多，不過講唔晒，唔好嘥時間，算啦」。


人民力量陳偉業喺個位度話蔣係「癲雞」，最終主席要叫大家「唔好忘記呢度係會議廳，要維護議會尊嚴」，蔣麗芸就好不滿咁離開議事廳。