WhatsApp雙藍剔 議員有壓力

【明報專訊】即時通訊軟件WhatsApp噚日推出「雙藍剔」新功能，無論係Android、iOS版本，如果對方已經睇咗你嘅信息，信息旁嘅「雙剔」圖案會變成藍色。「長撳」個信息，仲可以隨時睇到收到你信息嘅上司、戀人甚至仇人睇信息嘅時間。唔少立法會議員都有用WhatsApp，部分更用嚟通知出席會議，有議員話覺得好有壓力咁講。


毛孟靜：唔覆或會被人誤會

公民黨毛孟靜話，通常人都係自私，傳信息出去，總係想對方快啲答，佢認為新功能有少少侵犯私穩，又會令人覺得唔好意思。佢舉例，如果正在開車，通常唔會覆短訊，但家對方會以為被冷待，擔心會有壓力。資訊科技界議員莫乃光就話，擔心將來記者大哥大姐會鬧佢唔覆短訊，但佢認為壓力只會喺某種關係嘅用戶間出現，自己都睇得開。


民建聯蔣麗芸同老公一向有用WhatsApp溝通，佢認為新功能唔係太大問題，因為如果唔能夠立即回覆，佢通常都會傳一句「hold」、「call u back later」畀對方，算負責任。但佢話都理解有人想要多啲個人時間，「咪叫佢哋用少啲WhatsApp囉！」


Emily就比較關心日後群組中、傳信息者可以睇到群組所有人幾點睇過信息。議員一向有靠WhatsApp溝通避免流會，日後一切陽光下進行，如果有人「明知故流」，豈不是更大責任？