獅山黃傘logo被製tee 設計師譴責偷圖

【明報專訊】「香港蜘蛛仔」喺獅子山掛上「我要真普選」直幡一幕，成為爭普選運動中嘅印記之一。本地設計師Vasco Lam早排以此作概念，製作咗一個獅子山黃傘嘅標誌，畀人喺facebook貼上，不過，Vasco噚日喺facebook貼上「嚴正聲明」，話有人用咗佢個logo，用嚟印製T恤並出售牟利，售價68元一件。佢鬧取用者可惡，「請不問自取該圖或設計概念的相關人士回頭是岸！」佢其後再喺fb話見到相關貨物已經下架。


范國威派獅山年曆

其實唔使用人哋嘅設計，都可以應用到「獅子山普選圖」嘅。新同盟立法會議員范國威就話，下周一起，於金鐘、旺角、銅鑼灣3個佔領區，向市民免費派發獅子山2015座枱年曆。佢話大家將年曆拎返屋企，就等於將真普選理念帶到社區散播喎。