「屋邨仔」許sir表愛港情

【明報專訊】文章點名許sir：下班更適合談

佔中發起人之一陳健民噚日喺報章寫咗篇文〈給下班後的許sir〉，回應警察公共關係科總警司許鎮德（許sir）話佔領倡議者不負責任，陳教授問，點解大家唔搵出問題嘅根源、向政府施壓，但就將佔領責任放在佔領者身上，文中仲話「我覺得你對香港是有一份感情的。但可能你下了班，才是更適合談論這問題的時候」。陳健民點名評許sir，許sir就recap陳健民嘅觀點，隔空回應陳健民。


土生土長 盼「珍惜呢個家」

講起對香港嘅感情，許sir噚日即刻賣溫情，話自己作為土生土長嘅香港人，喺屋邨長大，喺香港接受教育，「對香港有非常深厚感情」，所以佢希望大家「要愛護同珍惜呢個家」，結論仍係呼籲佔領者盡快撤離。


陳健民嘅文章，仲批評政府高層再一次將警察當成磨心，「覺得好卑鄙」。「屋邨仔」許sir回應話警方係政治中立，作為香港治安秩序守護者，警方有法律責任呼籲市民唔好再做違法行為，而佔領係違法，亦係不同衝突事件根源，所以由佢呼籲停止佔領係合情、合理咁話。