瑞銀客戶顧問唔識交叉盤

【明報專訊】瑞銀雖然貴為大行，不過旗下就竟然有員工因為落錯盤而要畀證監會罰款40萬元。證監會噚日公布，2009年9月瑞銀有位客人想用人手交叉盤放售股份，但負責嘅客戶顧問岳思穎因為唔識做交叉盤，竟然同佢助理落錯盤，幫位客人做左一連串場內對盤交易。


證監會就認為呢位客戶顧問身為註冊人嘅身分受質疑，若然唔肯定交易指示，就應該盡力釐清，同埋向瑞銀匯報返件事。據證監會所講，呢位客戶顧問係2006年就已經獲金管局註冊，而且受聘於瑞銀可以進行第1類（證券交易）嘅受規管活動，即係事發當日入行已經有3年時間。


不過，證監會提到，佢係單交易入面無個人利益，亦無證據指明單對盤交易係出於操控，對有關公司股份按盤價亦影響輕微，過往又未畀證監會罰過，所以就罰咗佢40萬元了事。雖則話證監會罰得輕，但瑞銀自己又點呢？瑞銀發言人就唔肯透露呢位員工受到咩處分，就連佢仲喺唔喺度做都唔肯講囉。


[小琴密語 email: piano@mingpao.com]