尊重顧明均意願浸大取消頒學位

【明報專訊】浸會大學原本喺今個月17號嘅畢業禮向「電子大王」顧明均（圖）頒授榮譽工商管理博士學位，但就「食檸檬」，顧明均上月底寫咗封信畀校長陳新滋同傳媒，大罵佔領行動暴力，要求浸大取消向佢頒授榮譽學位，雖然陳新滋曾經「挽留」，佢仍然唔肯回心轉意。


曾一口氣捐咗1億元畀浸大嘅顧明均，早前批評佔中阻路，令佢接受榮譽博士都冇意思，仲話要向涉嫌打公民黨曾健超嘅「警隊七雄」致以最高敬禮。據浸大噚日講，陳校長打過電話畀顧明均，話好有誠意向佢頒授榮譽博士，希望佢「收回成命」，但顧明均重申心意已決，浸大覺得好可惜，但尊重佢嘅意願，會取消向佢頒授榮譽博士學位。陳校長又話希望未來同佢保持友好聯繫，繼續得到佢嘅襄助。


不過呢個決定可能都係好事，事關浸大學生會之前講明，若顧出席畢業禮，一定會因應佢嘅反佔中言論「招呼」佢。