撐佔領食店 優惠最後4日

【明報專訊】Emily噚日喺網上見到，一間位於銅鑼灣佔領區附近、名叫「大阪李朝園」嘅韓式餐廳，門口寫住「雨傘革命 港人八折 倒數四天」，被網民讚係良心食肆。有網民仲將佢同隔籬街老闆反佔中嘅喜記比較，話就算大阪李朝園加價都唔會去喜記。


Emily就去咗駱克道搵大阪李朝園嘅店長羅先生，佢話佔領運動一度影響生意，故上月初決定推出「港人八折」優惠，希望吸客同支持運動。羅店長話原本諗住只向學生提供優惠，但因運動係全香港人嘅事，當時決定將優惠畀晒港人。


羅店長又話，唔少顧客令佢好感動，有部分食客話唔使折扣，部分人喺意見卡寫上支持說話，包括「支持的人是無私的」、欣賞舖頭喺銅鑼灣貴租都提供八折優惠等。


優惠仲有幾日完結，羅先生話係公司生意決定，同近日熱議金鐘退場無關，佢哋亦無受到任何壓力。羅先生仲話，家計劃緊向學生提供優惠。