楊家誠胃口太大 伯明翰又賣唔成

【明報專訊】過足英超班主癮嘅伯明翰（2309）大股東楊家誠，早喺今年初因為被法庭裁定洗黑錢罪成入獄前，已經開始放盤想賣球會，甚至賣成間上市公司，不過就賣極都賣唔成，有消息人士話，楊生雖然已經受緊牢獄之災，不過胃口依然夠晒大，所以搞到啲買家都怕咗佢喎。


話說伯明翰早排委任咗兩名內地人張成同馬瑞昌入董事局，仲計劃發換股債畀佢哋，聽講就係準備賣盤，不過尋日又突然宣布終止安排。查實計埋已經降落英冠嘅伯明翰球會，公司過去幾年單計枱面公開畀買家斟都有3至4次，但小琴聽講，如果計埋嗰啲曾經初步傾過一兩次嘅，肯定超過10次囉。


咁點解傾極都傾唔成呢？小琴聽老友講，試過幾次幫佢拉線，最後都畀佢拒絕咗，皆因雖然楊生財政唔多理想，但對價錢要求依然好高，搞搞吓都唔想再幫佢搵買家，咁搞法真係唔知究竟伯明翰何年何月先搵到下家。