高達藏身「獅子山」

【明報專訊】早前市民喺獅子山掛咗「我要真普選」直幡引起哄動，雖然掛咗一日就被拆走，呢個情景已啟發咗唔少人創作藝術品。Emily留意到喺金鐘公民廣場旁邊，有市民以模型1:144嘅比例，重現獅子山掛上「我要真普選」一幕，吸引唔少人及留守者影相。


發泡膠上倒石膏噴漆

唔好以為只係一座模型咁簡單，仔細睇原來直幡旁邊有紅繩繫住，山頂上仲有幾個「人仔」撐住黃傘，十足十當日攀山掛橫額嘅一班「蜘蛛仔」。Emily同砌模型嘅Ray傾過，佢話自己平時教人砌高達模型，而原來呢座假山內亦暗藏高達！呢座山由發泡膠做底，喺上面倒石膏同噴漆，然後整出石嘅紋理，並放上「樹木」。佢話已經砌咗一個星期，接近完工，所以拎出嚟擺埋一班「人仔」上去。


Ray覺得喺獅子山掛直幡一事好震撼，「尤其我做創作，見到由有到冇，係好震撼，拆咗（直幡）有啲可惜」。佢又覺得直幡寫咗「真普選」，而非單單寫上「普選」，「 明顯恥笑緊政府 」，表達港人心聲，所以希望砌模型保留呢一幕。