吳克儉又出埠 訪德瑞5日

【明報專訊】教育局長吳克儉又出埠喇，佢今日會率領教育代表團到德國同瑞士訪問5日，了解當地嘅職業教育制度，以及促進年輕人就業發展嘅方案，並會同來自亞洲嘅留學生會面，了解佢哋嘅校園生活，推廣香港作為區域教育樞紐嘅角色。


吳克儉先去德國，到訪海德堡大學、法蘭克福嘅工藝會、柏林工商會、當地嘅訓練中心，以及柏林自由大學，之後瑞士伯恩，到訪聯邦職業教育與培訓協會同一間電訊企業，最後會去瑞士蘇黎世，參觀藝術大學、當地一間商學院，仲有一間電子及高科技企業。行程中佢會同當地教育同研究部門官員、大學教授等見面交流。


今次隨團嘅有教育局首席助理秘書長（延續教育）翁佩雲同政治助理施俊輝、教統會主席鄭慕智、職訓局副主席黃天祥及副執行幹事梁任城；希望佢哋返香港後度到新橋，學特首梁振英話齋，改善年輕人嘅出路、幫佢哋實現理想。