鑽的最佳乘客 套票獎品變提子

【明報專訊】一直提供無障礙的士服務嘅「鑽的」噚日搞咗個「我們最喜愛的鑽的乘客」頒獎禮，表揚3位乘客喺孝心、守時同禮貌等方面嘅表現，得獎者可以獲得三日兩夜台北無障礙旅遊套票。其中一名得獎者葉太因為平時坐輪椅嘅爸爸過咗身，就算獲表揚，都無辦法享受無障礙旅行機會，所以大會改送咗一盒巨峰提子代替，希望葉太一家人可以一齊享用。


表揚乘客孝心守時禮貌

呢個選舉由司機、「台姐」同「鑽的」辦公室員工提名，提名葉太嘅司機大佬就大讚葉太等車時永遠有早無遲。葉太分享感受時話好多謝大家，話咁大個女第一次攞獎，雖然獎品變成一盒提子，但都感到欣慰。行政會議召集人林煥光頒獎時就話，希望社會繼續建設無障礙設施，令需以輪椅代步嘅人更方便。