尼姑道長代爺姥勸佔領者回家

【明報專訊】有人話旺角係臥虎藏龍之地，噚日有約60個自稱宗教界人士，手持黃底紅字示威標語，到旺角要求佔領者離開，部分人穿上道士、和尚服，唔知點解會撈埋一齊反佔中，佢哋現身時更好似念經咁，不斷照稿重複讀出「爺爺姥姥叫孩子們回家吧」、「英國人統治香港100年，有給香港人民主自由嗎」等口號，叫佔領者盡快撤離、還路於民，引起佔領者不滿，最終佢哋逗留咗約20分鐘就搭旅遊巴離開。


呢班人有啲話自己係「宗教文化研究會」，有啲就話自己係叫「香港道教團體」。佢哋喺雅蘭中心附近落車，又派傳單，但就畀佔領者批評佢哋廣東話都未講得正，喺度做騷。雙方至少三度口角，最終警員將佢哋帶去朗豪坊附近。


道聯會：無叫人去旺角

Emily打去香港道教聯合會查詢，佢哋話無發動人落旺角，亦無一個屬會叫「香港道教團體」。本報又打過畀呢個「宗教文化研究會」會長易道，但佢手機飛咗去普通話留言信箱。