黃之鋒爸爸：唔擔心個仔

【明報專訊】學民思潮召集人黃之鋒成為雨傘運動焦點人物，Emily噚日喺一個記者會上遇到之鋒爸爸黃偉明（Roger），佢同Emily講一直唔擔心個仔，「日日都見到佢，佢心情幾好，有時話好累想瞓覺」。Roger話曾到金鐘佔領區，但唔會特別搵個仔，只係有次應阿仔請求幫佢買外置叉電器，方便長期佔領。


早前之鋒被警方扣留，Roger話其間收過公開大學電話，問有冇嘢需要幫手。佢又話呢排之鋒少咗返學，但最重要之鋒懂得平衡安排每件事。


另外，之鋒噚日喺美國《紐約時報》撰文，提醒當權者，今日唔畀年輕人未來，「他朝我們只會主宰你的未來……奪回屬於我們的民主，因為時間是屬於我們年輕一代」。之鋒又提到有心理準備再被拘捕，但如果坐監可令香港更美好，佢甘願付呢種代價。